Tamazɣa | Tutlayt | Tasekla | Tasenselkimt | Idles | Tussna | Imaziɣen | Ayen nniḍen
Aɣyul-nni

sɣuṛ  Ines Amzal

Aɣyul, iεebba ugar n wayen i εebban yemdanen di tallit-nni anda i t-seqdacen. Xas akken tudert ur fessuset ara di taddart, aɣyul yeṛwa-tent ugar. Imiren, aṭas i yesεan aɣyul, yerna ttafen-t di yal tawuri. Mi ara vennun medden, ttawin-d fell-as akal, asɣaṛ d uẓṛu. Lḥaṣul, aniɣeṛ yerra umdan, aɣyul yedda yid-s ama ar yiger, ar tala neɣ ar wulzuz. Yal taɣawsa, yerfed-itt af uεrur-is, d tafessast neɣ taẓayant. Ass d tineqqalin, ass wayeḍ d tavarda neɣ d acwari, mi s-kksen yiwen, ad as-rren wayeḍ.

Xas akken imdanen ttafen aɣyul yal tikkelt mi ara tesrin, yir awal yezga fell-as. Ala yir imeslayen i t-yeṭṭafaṛen. Amdan tikkwal itettu ansi i d-iεedda, itettu win i vedden yid-s deg yir tigʷnatin. Neɣ ahat akka i iga umdan, s kra n win i s-igan ayen yelhan, ittarra-t di rrif. Yettmekti-t-id kan asmi ara d-yaf iman-is deg yir tagʷnitt. Yerna amdan ɣuṛ-s allaɣ!

Af aya dɣa, mi ara nmuqel ar tsekla-nneɣ, ad naf aɣyul yedda-d aṭas deg yinzan neɣ di kra n tenfaliyin. Nerra-t kan i teḍṣa neɣ nettwali deg-s am tɣawsa ur nesεi azal, ur yuklal ara ayen yelhan. Gar yinzan d tenfaliyin i d-ttawin fell-as ad naf:
Yekrez-itt uzgar di tegrest, yečča-tt uɣyul deg unevdu.
Yeṭṭuki uzgar s ccna, i uɣyul ayɣeṛ yerna?
Rran-ak tavarda am uɣyul.
Aɣyul inehhar wayeḍ.


Nekk, cfiɣ mi lliɣ meẓẓiyeɣ, yella ɣuṛ-neɣ uɣyul. Yiwet n tikkelt, aɣyul-nni yella di tmazirt ikess, yurez seg uḍaṛ. Ciṭ kan akka yedduqes, yevda ijebbed akkin akka, dɣa yefsi-d yiciddi-nni. Weltma imir meẓẓiyet, tuɣ-itt tetturar di tmazirt. Nɣil ad tt-iseddu yid-s mi yettneggiz. Mi qriv ad yaweḍ ɣuṛ-s uɣyul-nni, yeḥves aneggez, amzun akken yeẓṛa d acu ara yeḍṛun ma iḥuza-tt. Yiwet n tikkelt daɣen, mi nekker ad neggaǧ si taddart, vava yewwi aɣyul-nni ad t-yezzenz. Ass-nni d tillas i d-yeɣlin fell-aɣ, acku nennum-it. Ihi, vava, yezzenz aɣyul-nni i yiwen n urgaz. Zrin wussan, nevda ntettu-t. Yiwen wass argaz-nni yuɣen aɣyul-nni nneɣ, yewwi-t yid-s ar wulzuz akken ad d-yeqḍu. Mi as-iεebba ayen i d-yuɣ, aɣyul-nni yerwel-as. Yeṭṭef-d avrid ar uxxam-nneɣ. Mi d-yewweḍ, yewwet-d af tewwurt s uḍaṛ-is. Newhem! Iɣeṛsiwen ceffun aṭas af wid iseḥviviren fell-asen. Wissen kan amdan.

14.09.2969/2019 16:00 Ines Amzal