Tamazɣa | Tutlayt | Tasekla | Tasenselkimt | Idles | Tussna | Imaziɣen | Ayen nniḍen
Tizelɣiwin timyaganin

sɣuṛ  Tilelli At Umalu

Tizelɣiwin timyaganin "n" (ar din) akkʷed "d" (ar da), d sin iferdisen i izemren ad d-asen deffir neɣ zdat n umyag. Si tama, snat-agi n tzelɣiwin sεant anamek n tnila, akken i d-seknen aṭas n yinagmayen i iqeddcen di taɣult n tesnilest. Si tama nniḍen tazelɣa "d" tezmer ad d-tesken aṭas n yinumak mačči kan d tanila.

Tazelɣa tamyagant "n" ur d-teqqim ara aṭas di tutlayt-nneɣ. Nettaf-itt kan di kra n tudrin. Ma di tudrin tiyyaḍ d tazelɣa "d" i yeṭṭfen amḍiq-is. Tazelɣa-a tamyagant, tezmer kan ad tesεu anamek n tnila. Anamek-is: ar din. Tettas-d zdat neɣ deffir n umyag.
☛ Ad n-awḍeɣ azekka.
☛ Iṛuḥ-n s axxam.
Tikkwal tazelɣa "n" tettuɣal "in", mi ara d-tas deffir n umqim awṣil n umyag.
☛ Ufiɣ-t-in itett.
❗ Nezmer ad d-naf tazelɣa "n", di kra n tenfaliyin anda ur yelli ara umyag.
☛ Aql-iyi-n.
☛ Ax-n!

Tazelɣa tamyagant "d" teskan-d daɣen tanila. Anamek-is: ar da. Nettaf-itt zdat neɣ deffir n umyag.
☛ ur d-yeffiɣ ara.
☛ Terza-d ɣuṛ-i.
Tazelɣa "d" tettuɣal "id", mi ara d-tas deffir n umqim awṣil n umyag.
☛ Wwiɣ-t-id yid-i.
❗ Tikkwal mi ara yili umyag agetnamkan (ɣuṛ-s aṭas n yinumak), anamek amezwaru yezmer ad yettwaseqdec s tzelɣa tamyagant "d", ma d anamek wis sin yessefk ad yettwaseqdec war tazelɣa. Am umyag "vru".
1. Yevra-d i tixsi-nni.
2. Yevra i tmeṭṭut-is.

Kra n yemyagen di tutlayt-nneɣ, tezga tenteḍ ɣuṛ-sen tzelɣa tamyagant "d", am: mmekti-d, as-d, vder-d. Mi ara tekkseḍ tazelɣa "d" i yemyagen-a ur seεεun ara anamek.

20.02.2970/2020 20:22 Tilelli At Umalu