Tamazɣa | Tutlayt | Tasekla | Tasenselkimt | Idles | Tussna | Imaziɣen | Ayen nniḍen
Imqimen di Tmaziɣt (1)

sɣuṛ  Tilelli At Umalu

Imqimen d awalen imeskilen i izemren ad ṭṭfen amkan n yisem. Di Tmaziɣt, llant aṭas n tiggayin n yemqimen:
- imqimen udmawanen ilelliyen
- imqimen iwṣilen usriden/irusriden
- imqimen iwṣilen n tenzeɣt
- imqimen imeskanen
- imqimen n wayla
- imqimen imassaɣen
- imqimen imaƫƫaren
.

1. Imqimen udmawanen ilelliyen
✓ Udem amezwaru, d win yeƫmeslayen: nekk, nekkʷni, nekkʷenti.
✓ Udem wis sin, d win i wumi ƫmeslayen: kečč, kemm, kʷenwi, kʷnemti.
✓ Udem wis kṛad, d win i ɣef ƫmeslayen: neƫƫa, neƫƫat, nitni, nitenti.

2. Imqimen iwṣilen usriden
✓ iyi, aneɣ/aɣ, anteɣ/aɣ, k, kem, kʷen, kʷent, t, ƫ, ten, tent.
✓ Nƫarra-ten deg umkan n yisem i d-yeƫƫasen d asemmad usrid.
Imedyaten:
Nečča seksu. → Nečča-t.
Iḥemmel imawlan-is. → Iḥemmel-iten.
Seggmen tixxamin-nsen. → Seggmen-tent.

❗ Amqim awṣil usrid nrennu-as "i" mi ara d-yas deffir umyag ikeffun s tergalt. Targalt ur ilaq ara ad tili d amatar udmawan.
☛ Yeffer-iten.
☛ Tegzem-.
☛ Tḥemmel-ik.

3. Imqimen iwṣilen arusriden
✓ iyi, aneɣ; aɣ, anteɣ; aɣ, ak, am, awen, kʷent, as, asen, asent.
✓ Nƫarra-ten deg umkan n yisem i d-yeƫƫasen d asemmad arusrid.
Imedyaten:
Tessawel i gma-s. → Tessawel-as.
Yefka tijeǧǧigin i tmeṭṭut-is. → Yefka-as tijeǧǧigin.
Tewwi-d tamacahuƫ i warraw-is. → Tewwi-asen-d tamacahuƫ.

❗ Amqim awṣil arusrid yeƫƫas-d d amezwaru af umqim awṣil usrid:
☛ Yuzen-ak-tent-id.
☛ Ad am-ten-id-yawi azekka.

❗Akken twalam amqim awṣil usrid d umqim awṣil arusrid, ƫƫasen-d deffir n umyag. Tikkwal daɣen yezmer ad d-zwiren amyag. Imedyaten:
Ad t-yaru.
Yuggʷad mi ten-iwala.
Ur as-nnin ara.

27.05.2969/2019 14:00 Tilelli At Umalu