Tamazɣa | Tutlayt | Tasekla | Tasenselkimt | Idles | Tussna | Imaziɣen | Ayen nniḍen
Anay Amaziɣ

sɣuṛ  Amayas Tiliwin

Anay Amaziɣ d azamul n ugdud Amaziɣ, n Tmaziɣin d Yimaziɣen anda ma llan. Yeffeɣ-d deg ussegʷas n 2920/1970 sɣuṛ taddukli Agraw Imaziɣen i yesvedd Muḥend Bessaoud, Ṭawes Amrouche d wiyaḍ. Qqaṛen-d d Youcef Amazigh, amedraw n tddukli-a, si tama n Mekla, agezdu n Tizi Uzzu, i d-yevdan leqdic fell-as. Deg ussegʷas n 2947/1997, seknen-d anay-a s wudem unṣiv di temlilit tamezwarut n Agraw Amaḍlan Amaziɣ (AAA/CMA) di Tafira (Tigzirin Tiknariyin).

Anay Amaziɣ ɣuṛ-s 3 n tvaɣusin tiglawanin. Tamezwarut, sufella, ini-yis d azerwal, izemlen ilel d-yezzin i wakal n Tmazɣa d yigenni. Di tlemmast d azegzaw, izemlen agama n Tmazɣa d temsirwa. Seddaw-as d awṛaɣ, izemlen akal n Tmazɣa. Sufella-nsen yerna-d asekkil (az) n tifinaɣ, tira tamzikit n Yimaziɣen. Asekkil-a izemmel tutlayt Tamaziɣt, ini-yis azeggʷaɣ d idammen i d-yettaken tudert d tevɣest. Ur ntettu ara, tilelli s yidammen i tura.

Tura aṭas aya mi yettili wanay Amaziɣ di yal tama n Tmazɣa. Ad t-naf di temliliyin, di tmeɣṛiwin, di tudrin, deg yexxamen. Daɣen ttawin-t medden ar wannar n ddavex n uḍaṛ, ar tmesvaniyin. Anay-a d win n tmagit yesddukulen agdud amaziɣ. Yesmektay-d imaziɣen ad msuɣalen akkʷed tutlayt-nsen d umezruy-nsen n tidett. Uzzlen fell-as yidammen, kecmen fell-as ar usekraf. Ass n 25 n Yunyu 2948/1998, 21 n yissegʷasen aya mi nɣan Matoub Lounes, azamul n tmagit Tamaziɣt. Matoub Lounes am wanay Amaziɣ, ttaken-d asirem. S tddukli ad naweḍ ar tlelli.

25.06.2969/2019 18:30 Amayas Tiliwin