Tamazɣa | Tutlayt | Tasekla | Tasenselkimt | Idles | Tussna | Imaziɣen | Ayen nniḍen
Matoub Lounes: idurar ad rmimzen!

sɣuṛ  Ines Amzal

Meεṭub Lwennas ilul ass n 24.01.1956 di taddart n Tewrirt Musa Waεmaṛ, taɣiwant n At Dwala, i d-yuzgan deg Ugezdu n Tizi Uzzu. Tamurt tella imiren ddaw uzaglu n Fṛansa. Irgazen ƫeffɣen ixxamen-nsen, ƫƫinigen akken ad d-ssasin aɣṛum i twaculin-nsen. D aya i yewwin vava-s n Lwennas ad yinig ɣeṛ Fṛansa deg ussegʷas n 1946. Mi yewweḍ Lwennas semmus n yissegʷasen, yekcem ar uɣeṛvaz di taddart-is. Xas meẓẓi, yukʷi i wayen iḍeṛṛun deg wakal n tmurt-is. Tutlayt yeƫmeslay, ur ƫ-yufi ara deg uɣeṛvaz anda yeqqaṛ. Yuɣal yeƫgami ad yaẓ s aɣeṛvaz, yezga ireggʷel fell-as. Dɣa aṭas n tikkal i t-id-ḥwin. Ar taggara, yefren ad yeğğ aɣeṛvaz akken ad yelmed i yiman-is.

Yekcem annar n ccna deg ussegʷas n 1970. Di 1978, isuffeɣ-d tasfift-is tamezwarut: "Ay izem". Syen akkin, isuffuɣ-d tizlatin ta deffir ta, s wawalen i yeƫƫaru neƫƫa s yiman-is. Tugeƫ n tezlatin-is wwint-d ɣef wid yeṭṭfen tamurt s yiɣil. Xas yeƫnaɣ s talwit, wid i t-iεussen, talwit ur ƫ-ssinen ara. Di 09.10.1988, Lwennas yewwet-it yiwen ujadaṛmi s 5 teṛṣaṣin di Tala n Wudi (Micli). Di 25.09.1994, yeḥwes-it yiwen ugraw yezzuzuren tikta n taεṛavt-tineslemt. Armi kkan 15 n wussan i s-d-serḥen. Di 25.06.1998 i yeɣli Lwennas. Nɣan-t di Tala Bunan, kra n wussan kan seg mi d-teffeɣ tesfift-is taneggarut.

Dda Lwennas, seg yimezwura-nneɣ i d-yuɣ aẓaṛ. Di tudert-is ur yekni, akken vɣun ilin wussan i t-id-yemmugren. Yennuɣ ɣef tutlayt d yedles amaziɣ, yennuɣ ɣef tugdut d yizerfan n umdan. Asirem-is, Tamazɣa ad d-tsemlil arraw-is. Ad kksen azaglu yeqqnen fell-as. Xas akka ur yelli gar-aneɣ, yenǧeṛ-aɣ avrid ar tideƫ.

06.09.2968/2018 18:50 Ines Amzal