Tamazɣa | Tutlayt | Tasekla | Tasenselkimt | Idles | Tussna | Imaziɣen | Ayen nniḍen
At Dwala

sɣuṛ  Tilelli At Umalu

At Dwala d yiwet n tɣiwant i d-yuzgan deg unẓul n teɣṛemt n Tizi Uzzu. Seg Wat Dwala ar Tizi Uzzu llan 17 km. Ad naf daɣen tuli s wazal n 850 lmitrat af yilel. Ma d timnaḍin i as-d-yezzin, ad naf seg ugafa tezzi-as-d Laṛevεa n At Σisi, seg unẓul d Iwaḍiyen, seg usamar d At Meḥmud, ma seg umalu d At Zmenzer. At Dwala tevḍa af waṭas n tudrin gar-asent: Iɣil Bbʷeẓṛu (Iɣil n Uẓṛu), Tagemmunt Ukerruc, Tiɣẓeṛt, Taddart Ufella, Ayt Yidir, atg. Taɣiwant-a, zedɣen deg-s azal n 21 551 n yimezdaɣ deg ussegʷas n 2008.

Amnekcam aṛumi yesvedd deg At Dwala kra n yiɣeṛvazen n uswir amenzu. Gar-asen ad naf aɣeṛvaz n Tewrirt Musa waamaṛ i kfan di 1893. Deg uɣeṛvaz-a dɣa i yesɣaṛ yiwen gar wid i ilulen di temnaḍt-a n At Dwala. Wagi d amyaru Mouloud Feraoun (1913-1960, Tizi Hibel). Daɣen Albert Camus (1913-1960) d Emmanuel Roblès (1914-1995) rzan ar uɣeṛvaz-a imi d imeddukʷal n Mouloud Feraoun. Mi ara nmuqel ar umezruy n temnaḍt-a ad naf tefka-d aṭas n tlawin d yergazen i iqeddcen af uzekka n tmurt. Ad ten-naf di yal taɣult ama d ccna, tasertit, tasekla, tadamsa d waddal, atg. Gar-asen ad naf: Faḍma Ait Mansour Amrouche (1882-1967), Imache Amar (1895-1960), Mouloud Feraoun (1913-1960), Matoub Lounes (1956-1998), Issad Rebrab (1944), Mouloud Iboud (1953), Malika Domran (1956), Cherif Hamani (1956), Zedek Mouloud (1960), atg.

Ass-a, ur nezmir ara ad d-nader At Dwala war ma nemmekta-d aẓaṛ n Tefsut Taverkant n 2001. Sin kan n wussan i d-yeqqimen i usmekti n Tefsut n Yimaziɣen, tmuger-itt-id twaɣit nniḍen. Di taddart Agʷni Arus ijadaṛmiyen wwten s teṛṣaṣin Guermah Massinissa. Ass n 20-04-2001, anelmad-a n tesnawit yeǧǧa wid iḥemmel d wid i t-iḥemmlen. Yewwi-d fell-aɣ ad nissin tudrin-nneɣ d umezruy-nsent, akka azekka-nneɣ ur yettuɣal ara d aẓekka.

30.12.2968/2018 20:35 Tilelli At Umalu