Tamazɣa | Tutlayt | Tasekla | Tasenselkimt | Idles | Tussna | Imaziɣen | Ayen nniḍen
Ṭawes Amṛuc

sɣuṛ  Ameẓyan Tighilt

Ṭawes Amṛuc (1913-1973), d Tamaziɣt i d-yefkan aṭas i yedles-is amaziɣ. Tawacult-is, vava-s Velkasem Amṛuc, yemma-s Faḍma At Mansur akkʷed gma-s ameqqʷṛan Jean, llan zedɣen deg Iɣil Ali. Syen, gguǧen ar Tunes anda tlul Ṭawes. Ṭawes tuɣal d tacennayt s Tmaziɣt, daɣen d tamyarut s Tefṛansist.

Tevda si ccna amensay amaziɣ i d-telmed ar yemma-s. Deg ussegʷas n 1938, tecna-d zdat n lɣaci amudd n tezlatin-is di Paris akkʷed Munich. Deg Ugraw n Ccna n Fes (1939), fkan-as arraz akken ad teqdec di Casa de Velázquez (Madrid) ɣef ccna amensay amaziɣ d win n Spenyul. Tsuffeɣ-d aṭas n yiḍevsiyen n ccna s Tmaziɣt, amezwaru d "Chants berbères de Kabylie" di 1967, s wayes tewwi arraz ameqqʷṛan n uḍevsi. Syen akkin: "Chants de processions, méditations et danses sacrées berbères" (1967), "Chants de l'Atlas" (1971), "Chants berbères de la meule et du berceau" (1975).

Deg ussegʷas n 1947, tsuffeɣ-d ungal-is amezwaru "Jacynthe Noire" s tefṛansist. D nettat i d tameṭṭut tamaziɣt tamezwarut i yuran ungal. Tettwasen s udlis "Le Grain Magique" i d-tsuffeɣ di 1966. D amudd n tmucuha n yemma-s, n yinzan, n tezlatin d yisefra s Tmaziɣt i d-tsuɣel ar Tefṛansist. Teqdec daɣen di ṛṛadyu n Fṛansa anda teṭṭef aṭas n tedwilin tidelsanin, am "Chants sauvés de l’oubli", "Hommage au chant profond", "L'étoile de chance".

Ur ntettu ara ad d-nini, Ṭawes Amṛuc d tameṭṭut i yellan gar yimezwura i d-yesvedden tiddukla Agraw Amaziɣ ("Académie Berbère") di Paris deg ussegʷas n 1966. Ṭawes Amṛuc teǧǧa-aneɣ-d aṭas. D awezɣi ad tt-nettu.

26.12.2968/2018 22:30 Ameẓyan Tighilt